Organización Mundial da Saúde define a Saúde Pública como “a ciencia e o arte de promove-la saúde, previ-la enfermidade e prolonga-la vida mediante esforzos organizados da sociedade”.

O grupo de traballo constitúese para promove-la xeración e difusión da evidencia científica deste campo das ciencias da saúde, con visión orientada aos coidados, á promoción da saúde e á prevención da enfermidade, adaptándose ás necesidades cambiantes da poboación e aos retos emerxentes en saúde pública.

Neste contexto, o grupo desenvolve a súa actividade na análise e difusión de coñecemento baseado na evidencia en ámbitos clave como a vacinación, a prevención de enfermidades transmisibles e non transmisibles e a resposta a novos problemas de saúde pública, promovendo a elaboración de materiais científicos e divulgativos e a participación en actividades formativas que contribúan á actualización dos profesionais e á mellora da saúde da poboación.

Para acadar estes fins, o grupo de traballo establece as seguintes áreas específicas de actuación:

• Inmunización/vacinación.
• Redes sentinela de epidemioloxía de coidados.
• Estudo e divulgación dos resultados dos programas de vixilancia epidemiolóxica oficiais, de enfermidades transmisibles, non transmisibles e relacionados coa saúde laboral e ambiental.