O Grupo de Traballo de Coidados Paliativos da AGEFEC nace co propósito de contribuír á mellora continua da atención ás persoas con enfermidades avanzadas, crónicas complexas ou en situación de final de vida, así como ao acompañamento das súas familias e persoas coidadoras. Este enfoque baséase nun modelo de atención integral, centrado na persoa, que ten en conta as súas necesidades físicas, emocionais, sociais e espirituais, respectando en todo momento os seus valores, preferencias e dereitos.

Dende a perspectiva da enfermaría de familia, os coidados paliativos adquiren unha especial relevancia ao desenvolverse maioritariamente no ámbito da atención primaria e no propio domicilio das persoas. Neste contexto, a enfermeira convértese nunha figura clave para garantir a continuidade asistencial, a coordinación entre niveis e profesionais, e o acompañamento ao longo de todo o proceso de enfermidade e no duelo.

O grupo promove iniciativas orientadas a mellorar a calidade dos coidados, facilitar a identificación precoz das necesidades paliativas, e favorecer procesos como a toma de decisións compartidas e a planificación anticipada de coidados. Así mesmo, impulsa a elaboración e difusión de materiais formativos e divulgativos (infografías, guías, contidos audiovisuais), dirixidos tanto a profesionais sanitarios como á cidadanía, co fin de achegar coñecemento rigoroso e accesible.

A través dun traballo colaborativo, o Grupo de Traballo pretende consolidarse como un espazo de referencia para a actualización científica, o intercambio de boas prácticas e a promoción dunha atención paliativa humanizada, equitativa e baseada na evidencia.